Թաիլանդում ՀՀ դեսպան Վահե Գևորգյանն իր հավատարմագրերն է հանձնել Թաիլանդի թագավորին

10 փետրվարի, 2026

Փետրվարի 10-ին Թաիլանդի Թագավորությունում Հայաստանի Հանրապետության դեսպան Վահե Գևորգյանն (նստավայրը` Պեկին) իր հավատարմագրերն է հանձնել Թաիլանդի Թագավոր Նորին Մեծություն Մահա Վաջիրալոնգկորն Ֆրա Վաջիրակլաոչաոյուհուային։

Բանգկոկի Թագավորական պալատում տեղի ունեցած հանդիսավոր արարողության ընթացքում դեսպան Գևորգյանն ընդգծել է երկու ժողովուրդների միջև բարեկամության ամրապնդման ուղղությամբ առավելագույն ջանքեր գործադրելու պատրաստակամությունը։

Թաիլանդի Թագավորը շնորհավորել է դեսպան Գևորգյանին պաշտոնը ստանձնելու կապակցությամբ՝ մաղթելով հաջողություն իր առաքելության ընթացքում։

Թաիլանդի թագավորը նշել է, որ երկու երկրների միջև ջերմ և կառուցողական կապերը կարևոր հիմք են երկկողմ փոխգործակցության խորացման գործում, ինչպես նաև նաև նպաստում են տարածաշրջանային և գլոբալ համագործակցության զարգացման նախաձեռնություններին:

Հավատարմագրերի հանձնման արարողությունից հետո տեղի է ունեցել Վահե Գևորգյանի և Թաիլանդի արտաքին գործերի նախարար Սիհասակ Ֆուանգկեոուի առանձնազրույցը, որի ընթացքում քննարկվել են երկկողմ և բազմակողմ համագործակցության հարցեր։

ՀՀ դեսպանը ներկայացրել է Հայաստանում այս տարի հոկտեմբերին կայանալիք Կենսաբազմազանության մասին կոնվենցիայի կողմերի 17-րդ համաժողովի (COP17) շրջանակներում հայկական նախագահության առաջնահերթությունները և շնորհակալություն հայտնել Թաիլանդին COP17-ի շրջանակներում ակտիվ փոխգործակցության համար։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր