ՉԺՀ-ում ՀՀ դեսպան Սերգեյ Մանասարյանի ուղերձը Հայոց Ցեղասպանության 105-րդ տարելիցի կապացությամբ

23 ապրիլի, 2020

Հարգելի հայրենակիցներ,

Հայտնում ենք, որ այս տարի ապրիլի 24-ին Պեկինում ՀՀ դեսպանությունում Հայոց Ցեղասպանության տարելիցին նվիրված և Մեծ Եղեռնի զոհերին հարգանքի տուրքի մատուցման ամենամյա միջոցառումը չի կայանալու՝ պայմանավորված Չինաստանում նոր տիպի կորոնավիրուսի համավարակի դեմ ձեռնարկվող կանխարեգելման և զսպման միջոցառումներին հետևելու հանգամանքով:

Ապրիլի 24-ը խորհրդանշում է մարդկության պատմության դաժանագույն էջերից մեկը։ Հայոց ցեղասպանության ճանաչումը և դատապարտումը մի քանի սերունդների և ամբողջ հայության միասնական գործն է: Վստահ ենք, որ ողջ հայ ժողովուրդը հավատարիմ է մնալու պատմական արդարությունը վերականգնելու և մարդկության դեմ ծանրագույն հանցագործության հետևանքները հաղթահարելու իրենց վճռականությանը:

Սակայն Հայոց ցեղասպանության ճանաչումը և դատապարտումը միայն համահայկական խնդիր չէ. այն վաղուց ի վեր ձեռք է բերել համամարդկաին նշանակություն, քանի որ Հայոց ցեղասպանության ճանաչումը համարվում է ցեղասպանության հանցագործության կանխարգելման ամենագործուն քայլերից մեկը: Այն շարունակում է մնալ Հայաստանի արտաքին քաղաքականության առաջնահերթությունների շարքում: Այսօր Հայաստանը ևս մեկ անգամ ընդգծում է իր վճռականությունը ներդրում ունենալու միջազգային հանրության՝ ապագա ցեղասպանությունների կանխարգելմանն ուղղված միջոցների մշակման համատեղ ջանքերում, որպեսզի «այլևս երբեքը» մեկընդմիշտ ամրագրվի մարդկության պատմության էջերին:

Ի գիտություն։ Արտակարգ իրավիճակի պայմաններում Հայոց ցեղասպանության 105-րդ տարելիցի միջոցառումների շրջանակներում ապրիլի 24-ին, Երևանի ժամանակով ժամը 08:00-ից սկսած, քաղաքացիները կարող են հաղորդագրություն ուղարկել 1915 կարճ համարին Հայաստանից, և 0037433191500՝ արտասահմանից։ Հաղորդագրություն ուղարկած քաղաքացիների անունները կարտացոլվեն հուշահամալիրի սյուներին` այդպիսով ազդարարելով իրենց խորհրդանշական մասնակցությունը և հարգանքի տուրքը Սուրբ նահատակների հիշատակին։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր