Մոնղոլիայում կստեղծվի հայաստանյան բուհերի շրջանավարտների ակումբ

14 մարտի, 2014

Մոնղոլիայում ՀՀ դեսպան Արմեն Սարգսյանը (նստավայրը` Պեկին) մարտի 14-ին Ուլան Բատորում հանդիպում ունեցավ Մոնղոլիայի մշակույթի, սպորտի և տուրիզմի նախարար տկն. Օյունգերել Ցեդևդամբայի հետ: Հանդիպմանը քննարկվեցին երկու երկրների միջև մշակութային կապերի զարգացման, սպորտի և զբոսաշրջության ոլորտներում համագործակցության հաստատման հնարավորությունները: Ընդգծվեց, որ տվյալ բնագավառներում համատեղ ծրագրերի իրականացման և ակտիվ կապերի սկզբնավորման համար համապատասխան գերատեսչությունների միջև անհրաժեշտ է կազմակերպել բարձրաստիճան փոխայցելություններ: Կարևորելով Հայաստանում ուսում ստացած Մոնղոլիայի քաղաքացիների դերը երկկողմ շփումների աշխուժացման հարցում՝ տկն. Օյունգերելը խոստացավ ամեն կերպ աջակցել Ուլան Բատորում հայաստանյան բուհերի շրջանավարտների ակումբ ստեղծելու հայկական կողմի նախաձեռնությանը:

Նույն օրը տեղի ունեցավ դեսպան Սարգսյանի հանդիպումը հայաստանյան բուհերի մոնղոլ շրջանավարտների հետ: Վերջիններս ակումբի ստեղծման գաղափարը ընդունեցին մեծ խանդավառությամբ՝ պատրաստակամություն հայտնելով անմիջապես ձեռնամուխ լինել դրա իրականացմանը: Նշենք որ, Հայաստանում ուսում են ստացել Մոնղոլիայի շուրջ 30 քաղաքացիներ, ովքեր մեծամասամբ սովորել են երաժշտական ուսումնարաններում ու պետական կոնսերվատորիայում: Ներկայումս նրանք հիմնականում աշխատում են Մոնղոլիայի օպերայի և բալետի թատրոնում, դասավանդում տեղի երաժշտական ուսումնական հաստատություներում: Ջերմ և անմիջական մթնոլորտում անցած հանդիպման ժամանակ նրանք կիսվեցին Հայաստանի մասին իրենց տպավորություններով, հիշեցին այնտեղ անցկացրած ուսանողական տարիները՝ ցանկություն հայտնելով կրկին այցելել Հայաստան: Հանդիպման ընթացքում քննարկվեց Հայաստանի աջակցությամբ և մասնակցությամբ Մոնղոլիայում Արամ Խաչատրյանի «Գայանե» բալետի բեմադրման հնարավորությունը: Դեսպան Սարգսյանը խոստացավ հարցը ներկայացնել համապատասխան մարմինների ուշադրությանը և անհրաժեշտ քայլեր ձեռնարկել այդ ուղղությամբ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր