Չինաստանում նշվեց Հայոց Ցեղասպանության 99-րդ տարելիցը

24 ապրիլի, 2014

Ապրիլի 24-ին Չինաստանում ՀՀ դեսպանությունում տեղի ունեցավ Հայոց Ցեղասպանության 99–րդ տարելիցին նվիրված հավաք-ընդունելություն: Միջոցառմանը մասնակցեցին Պեկինի տարբեր համալսարանների հայ ուսանողներ, գործարարներ: Ներկա էր նաև ՀՀ Ազգային Ժողովի պատգամավոր, արտաքին հարաբերությունների մշտական հանձնաժողովի անդամ Սամվել Ֆարմանյանը:

Դեսպանության տարածքում տեղադրված խաչքարի մոտ տեղի ունեցավ ծաղիկների զետեղման և խնկարկման արարողություն: Այնուհետև դեսպանության ընդունելությունների սրահում ներկաներին ողջունեց և ելույթ ունեցավ ՉԺՀ-ում ՀՀ դեսպան Արմեն Սարգսյանը, ով նաև ներկայացրեց Հայոց Ցեղասպանության 100-րդ տարելիցի կապակցությամբ իրականացվելիք հիմնական ծրագրերը, որոնց շուրջ տեղի ունեցան շահագրգիռ քննարկումներ:

Միջոցառման մասնակիցներին իր խոսքն ուղղեց նաև ՀՀ ԱԺ պատգամավոր Ս.Ֆարմանյանն, ով ներկայացրեց վերջերս Սիրիայի հայաբնակ Քեսաբ քաղաքում տեղի ունեցած դեպքերը և հայկական պատվիրակության Սիրիա կատարած այցի մանրամասները: Նա նաև պատասխանեց ներկաներին հուզող տարաբնույթ հարցերին:

Ելույթների ավարտին ցուցադրվեց Հայոց Ցեղասպանության վերաբերյալ փաստավավերագրական ֆիլմ, որին հաջորդեց ընդունելությունը:

Հայոց Ցեղասպանության 99-րդ տարելիցին նվիրված միջոցառումներ անցկացվեցին նաև ՉԺՀ Շանհայ և Հոնկոնգ քաղաքներում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր