Չինաստանը Հայաստանին նվիրել է արդիական շարժական հեռուստակայան

08 ապրիլի, 2015

Ապրիլի 8-ին Պեկինում կայացել է Հայաստանի հանրային հեռուստաընկերության համար նախատեսված շարժական հեռուստակայանի հայկական կողմին փոխանցման հանդիսավոր արարողությունը: Երեք մեքենաներից բաղկացած շարժակայանը, որը հագեցած է միջազգային չափանիշներին համապատասխանող նորագույն սարքավորումներով, տրամադրվել է ՉԺՀ կառավարության կողմից Հայաստանին հատկացվող ամենամյա անհատույց օգնության շրջանակներում:

Փոխանցման արարողությանը ներկա են գտնվել ՉԺՀ կոմերցիայի նախարարության պաշտոնատար անձինք, շարժակայանն արտադրող չինական INSTEC ընկերության ղեկավարությունը, ինչպես նաև չինական լրատվամիջոցների ներկայացուցիչներ:

Միջոցառման ընթացքում ելույթով հանդես է եկել Չինաստանում Հայաստանի դեսպան Արմեն Սարգսյանը: Նա շնորհակալություն է հայտնել չինական կողմին Հայաստանին տրամադրվող շարունակական տեխնիկական օժանդակության համար՝ նշելով, որ հայ ժողովուրդը բարձր է գնահատում բարեկամ չին ժողովրդի ցուցաբերած աջակցությունը: Այնուհետև INSTEC ընկերության նախագահ Ան Ֆընշոուն հանդիսավոր կերպով դեսպան Սարգսյանին է հանձնել շարժակայանի խորհրդանշական բանալին:

Չինական կողմի հետ ձեռք բերված պայմանավորվածության համաձայն շարժակայանը հատուկ բեռնատար ինքնաթիռով Հայաստան կառաքվի ապրիլի 15-ին՝ Հայոց Ցեղասպանության 100-րդ տարելիցին նվիրված հիշատակման արարողությունների լուսաբանումն ապահովելու նպատակով: Շարժակայանի վերջնական փորձարկումն ու շահագործումն ապահովելու համար Երևան կժամանի չինացի 9 մասնագետներից բաղկացած խումբ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր