ԿԳՄՍ նախարարի տեղակալ Նարինե Խաչատուրյանի գլխավորած պատվիրակությունը մասնակցել է Հնագույն քաղաքակրթությունների համաժողովի երրորդ նախարարական հանդիպմանը

02 դեկտեմբերի, 2019

Նոյեմբերի 27-ից 30-ը Չինաստանի մայրաքաղաք Պեկինում կայացած Հնագույն քաղաքակրթությունների ֆորումի 3-րդ նախարարական համաժողովին մասնակցեց ՀՀ Կրթության, գիտության, մշակույթի և սպորտի նախարարի տեղակալ Նարինե Խաչատուրյանի գլխավորած պատվիրակությունը։ Համաժողովին մասնակցում էին Հունաստանի, Չինաստանի, Եգիպտոսի, Իրանի, Իրաքի, Իտալիայի, Պերուի, ինչպես նաև որպես դիտորդ` Մեքսիկայի, Հնդկաստանի և Տաջիկստանի պատվիրակությունները։

Հայաստանի պատվիրակության ղեկավարը, համաժողովին ունեցած իր ելույթում անդրադարձ կատարեց Հայաստանի մի քանի հազարամյա պատմությանը` ընդգծելով, որ համաժողովին Հայաստանի մասնակցությունը պայմանավորված է հազարամյակների խորքից եկող ավանդույթներով, հարուստ շոշափելի և ոչ նյութական մշակութային արժեքներով, որոնք իրենց ազդեցությունն ունեն ոչ միայն տարածաշրջանային այլև համընդհանուր զարգացումների վրա:

Համաժողովի աշխատանքների արդյունքում մասնակից երկրները, այդ թվում Հայաստանի Հանրապետությունը, ընդունեցին «Պեկինի հռչակագիրը»։

Նույն օրը ՀՀ ԿԳՄՍ նախարարի տեղակալ Ն. Խաչատուրյանը և Չինաստանում ՀՀ դեսպան Ս. Մանասարյանը հանդիպումներ ունեցան Իրանի Մշակութային ժառանգության, ձեռնարվեստի և զբոսաշրջության նախարար Ալի Ասգար Մունեսանի, Եգիպտոսի Հնությունների նախարար Խալեդ Ալ-Անանիի և Չինաստանի Մշակույթի և զբոսաշրջության նախարար Լուո Շուգանի հետ: Հանդիպումների ընթացքում քննարկվեցին նշյալ երկրների հետ Հայաստանի հարաբերությունների հետագա սերտացման և մշակութային ոլորտում համագործակցության խորացման հնարավորություններն ու հեռանկարները:

Տեղեկանք. Հնագույն քաղաքակրթությունների համաժողովը ստեղծվել է 2017 թվականին: Համաժողովի առաջին նախարարական հանդիպումը տեղի է ունեցել Աթենքում, 2017թ. ապրիլի 24-ին՝ Չինաստանի և Հունաստանի համատեղ նախաձեռնությամբ: Երկրորդ հանդիպումը տեղի է ունեցել 2018թ. հուլիսի 13-ին՝ Բոլիվիայի մայրաքաղաք Լա Պասում։ Մասնակցել են Բոլիվիան, Հունաստանը, Չինաստանը, Եգիպտոսը, Իրանը, Իրաքը, Իտալիան, Պերուն, իսկ Հայաստանը դարձել է համաժողովի լիիրավ անդամ։

Հնագույն քաղաքակրթությունների համաժողովի չորրորդ նախարարական համաժողովը կայանալու է Պերուում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր