ՀՀ զինված ուժերի կազմավորման 34-ամյակին նվիրված միջոցառում Պեկինում

30 հունվարի, 2026

Հունվարի 30-ին ՉԺՀ-ում ՀՀ դեսպանությունը կազմակերպել էր պաշտոնական ընդունելություն՝ նվիրված ՀՀ զինված ուժերի կազմավորման 34-ամյակին:

Միջոցառմանը ներկա էին Պեկինում հավատարմագրված մի շարք երկրների ռազմական կցորդներ և ոլորտի այլ ներկայացուցիչներ, ինչպես նաև Չինաստանում բնակվող և կրթություն ստացող ՀՀ քաղաքացիներ:

Չինական կողմից որպես պատվավոր հյուր միջոցառմանը մասնակցել է Չինաստանի Ժողովրդա-ազատագրական բանակի Ազգային Պաշտպանական համալսարանի, պաշտպանական հետազոտությունների միջազգային ինստիտուտի պետ, գեներալ-մայոր Լիու Ճոնգբինը։

Հանդես գալով բացման խոսքով՝ ՉԺՀ-ում ՀՀ ռազմական կցորդ Գեորգի Նալբանդյանը ներկայացրել է օրվա խորհուրդը՝ ընդգծելով ՀՀ զինված ուժերի դերակատարումը ՀՀ պետականության կայացման և ամրապնդման գործում։ Առանձնահատուկ կերպով ընդգծվել է այս տարի հունվարի 27-ի՝ որպես հանուն հայրենիքի զոհվածների հիշատակի և խոնարհումի օրվա ոգեկոչումը։

ՉԺՀ-ում ՀՀ դեսպան Վահե Գևորգյանը, հանդես գալով ողջույնի խոսքով, նշել է, որ Հայաստանը զգալի ջանքեր է գործադրել տարածաշրջանային խաղաղության և անվտանգության ուղղությամբ, այդ թվում՝ հարևան երկրների հետ հարաբերությունների կարգավորման և միջազգային առաջատար դերակատարների հետ կապերի դիվերսիֆիկացման միջոցով։

Այս համատեքստում դեսպանը մատնանշել է անցյալ տարի Չինաստանի հետ հարաբերությունների՝ ռազմավարական գործընկերության մակարդակի բարձրացումը՝ ընդգծելով Չինաստանի հետ բոլոր ոլորտներում փոխգործակցության խորացման կարևորությունը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր