ՀՀ պատվիրակության մասնակցությունը Ասիայում մշակութային ժառանգության դաշինքի խորհրդի 4-րդ հանդիպմանը

19 հոկտեմբերի, 2026

2026թ․ հոկտեմբերի 18-ին ՉԺՀ Հանչժոու քաղաքում տեղի է ունեցել Ասիայում մշակութային ժառանգության դաշինքի (ԱՄԺԴ) խորհրդի 4-րդ հանդիպումը։

Միջոցառմանը բացման խոսքով հանդես է եկել ԱՄԺԴ-ի խորհրդի նախագահ, ՉԺՀ մշակույթի և զբոսաշրջության փոխնախարար, Մշակութային ժառանգության ազգային վարչության ղեկավար Ռաո Ցյուանը։

Ներկայացնելով համատեղ հնագիտական, ուսումնական և մասնագիտացված կենտրոնների ստեղծման, մշակութային ժառանգության ոլորտում համագործակցության խորացման և նորարարական տեխնոլոգիաների կիրառման ուղղությամբ ԱՄԺԴ-ի առաջիկա գործունեության վերաբերյալ առաջարկները՝ Ռ. Ցյուանը համոզմունք է հայտնել, որ դրանց իրականացումը կնպաստի անդամ երկրների միջև կապերի ամրապնդմանը, ինչպես նաև մշակութային ժառանգության պահպանմանն ու հանրահռչակմանը։

ՀՀ պատվիրակության անունից հանդես է եկել ՉԺՀ-ում ՀՀ դեսպանության առաջին քարտուղար Միսակ Բալայանը, ով իր ելույթում գոհունակությամբ արձանագրել է, որ ԱՄԺԴ-ն արդեն ձևավորվել է որպես հստակ նպատակներ ունեցող միջազգային համագործակցության հարթակ և կայուն առաջընթաց է գրանցում իր գործունեության մեջ։

Մ․ Բալայանը շնորհակալություն է հայտնել ՉԺՀ կառավարությանը դաշինքի և նրա քարտուղարության արդյունավետ գործունեության համար անհրաժեշտ պայմաններ ստեղծելու ուղղությամբ գործադրվող ջանքերի համար՝ միաժամանակ, վերահաստատելով դաշինքի աշխատանքներին ակտիվորեն ներգրավվելու Հայաստանի պատրաստակամությունը։

Անդրադառնալով միջազգային համագործակցության մեխանիզմների ամրապնդման և շահագրգիռ բոլոր կողմերի միջև փոխգործակցության խորացման ուղղությամբ Հայաստանի կողմից իրականացվող աշխատանքներին՝ Մ․ Բալայանը նշել է, որ 2026թ․ մայիսին Հայաստանը դարձել է Հակամարտությունների գոտիներում ժառանգության պաշտպանության միջազգային դաշինքի (ALIPH) անդամ։

Ելույթի ավարտին Մ․ Բալայանը հույս է հայտնել, որ ԱՄԺԴ-ի հետ համատեղ Հայաստանում իրականացվող առաջին ծրագիրն առաջիկայում կյանքի կկոչվի։

Խորհուրդը միաձայն ընդունել է ԱՄԺԴ-ի կանոնադրության փոփոխությունները, որոնք նպատակաուղղված են դաշինքի՝ որպես միջկառավարական կազմակերպության գործունեության իրավական հիմքերի կատարելագործմանը։ Խորհուրդը հաստատել է նաև Եգիպտոսին ԱՄԺԴ-ի գործընկեր երկրի, իսկ Ղազախստանին՝ դիտորդ երկրի կարգավիճակ շնորհելու որոշումները։

Հանդիպման շրջանակներում տեղի է ունեցել նաև ԱՄԺԴ-ի պաշտոնական կայքի (www.acha-asia.org) գործարկման հանդիսավոր արարողությունը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր